پاکستان آرمی کا سکیورٹی دستہ سب سے بڑے فٹ بال ٹورنامنٹ فیفا ورلڈ کپ 2022 کی سکیورٹی سنبھالنے کے لئے نور خان ائیر بیس سے قطر روانہ ہوگیا ہے۔
پاک آرمی کے آفیسرز، جونئیر کمیشنڈ آفیسرز اور جوانوں پر مشتمل سکیورٹی دستہ قطر روانہ ہوا ہے، جو فیفا ورلڈ کپ 2022ء کے دوران قطری حکومت کو سکیورٹی میں معاونت فراہم کرے گا۔
فیفا ورلڈ کپ 2022ء نومبر20 سے 18 دسمبر کے دوران قطر میں کھیلا جائے گا۔
اس ضمن میں 8 رُکنی عالمی فیفا ٹریننگ ٹیم نے ستمبر میں پاکستان کا دورہ کیا تھا، جس کے دوران ٹریننگ ٹیم نے پاکستان آرمی کے منتخب شدہ دستے کو فیفا سکیورٹی سے متعلق تربیت فراہم کی تھی۔
قطری حکومت نے پاکستان سے فیفا ورلڈ کپ 2022ء کے دوران سکیورٹی میں معاونت کی درخواست کی تھی۔
اس سے قبل قطری وزارت داخلہ کے 4 رُکنی وفد نے اگست میں پاکستان کا دورہ کیا تھا۔
