بیجنگ :چین نے کہا ہے کہ امریکا فوری طور پر افغان منجمد اثاثوں کو بحال کرے اور افغان اثاثوں کی افغانستان کو مکمل اور آزادانہ ادائیگی کرے۔
ترجمان چینی وزارت خارجہ ماؤننگ کا کہنا ہے کہ افغان مرکزی بینک کے امریکا میں منجمد اثاثے افغان قومی ملکیت ہیں جو افغانوں کی زندگیوں کے تحفظ کیلئے ضروری ہیں، افغان منجمد اثاثوں کی فوری، مکمل اور آزادانہ ادائیگی ہونی چاہیے۔
انہوں نے کہا کہ افغان اثاثے افغان عوام کی فلاح کے لیے کسی مداخلت کے بغیر استعمال ہونے چاہئیں، امریکہ افغان اثاثوں کو فوری غیر منجمد کرے اور یکطرفہ پابندیاں ہٹائے۔ترجمان چینی وزارت خارجہ نے کہا کہ امریکا افغانستان میں امن و استحکام کیلئے اپنی ذمہ داریاں ادا کرے۔
یاد رہے کہ گزشتہ برس اگست میں طالبان کے کابل پر کنٹرول کے بعد امریکی حکام نےامریکہ میں موجود افغان مرکزی بینک کے 7 ارب ڈالر کے اثاثے منجمد کر دئیے تھے، گزشتہ روز امریکہ نے افغانستان کے 3.5 بلین ڈالر کے اثاثے سوئٹزرلینڈ کے افغان فنڈ میں منتقل کرنے کا اعلان کیا تھا۔
