تمام کوششیں ملک کی دفاعی ضروریات کو مدنظر رکھ کر کی جارہی ہیں.ایرانی حکومت کی ترجمان فاطمہ مہاجرانی کی پریس کانفرنس
ایران کی حکومت نے روایتی حریت اسرائیل کے ساتھ بڑھتی ہوئی کشیدگی کے تناظر میں اپنا دفاعی بجٹ 200 فیصد اضافے سے تین گنا کرنے کی تجویز پیش کردی غیر نشریاتی ادارے کے مطابق ایرانی حکومت کی ترجمان فاطمہ مہاجرانی نے بتایا کہ روایتی حریفوں کے ایک دوسرے پر میزائل حملوں کے بعد ایرانی حکومت نے دفاعی بجٹ میں تین گنا اضافے کی تجویز پیش کی ہے.
ایرانی حکومت کی ترجمان فاطمہ مہاجرانی نے تہران میں پریس کانفرنس کرتے ہوئے ملک کے دفاعی بجٹ میں 200 فیصد کے نمایاں اضافے کے حکومتی منصوبے پر روشنی ڈالی لیکن ترجمان یا ایرانی حکومت نے تاحال دفاعی بجٹ میں اضافے سے متعلق کوئی اعداد و شمار پیش نہیں کیے ہیں. تھنک ٹینک ”اسٹاک ہوم انٹرنیشنل پیس ریسرچ انسٹی ٹیوٹ“ کے مطابق 2023 میں ایران کے دفاعی اخراجات 10 ارب 30 کروڑ ڈالر تھے آئندہ برس مارچ میں حتمی شکل دیے جانے تک مجوزہ بجٹ قانون سازوں کے درمیان زیر بحث آئے گا ایران پر اسرائیل کے جوابی حملے کے بعد دنوں ملکوں نے اقوام متحدہ کے اجلاس میں تلخ جملوں کے تبادلے کے دوران ایک دوسرے پر مشرق وسطیٰ کے امن کو خطرے سے دوچار کرنے کے الزامات عائد کیے تھے.
ایرانی فوج نے اسرائیلی حملے کے نتیجے میں 4 فوجی اہلکاروں کی شہادت اور ریڈار سسٹم کو نقصان پہنچنے کی تصدیق کی تھی واضح رہے کہ ایران نے اپنی حمایت یافتہ عسکری تنظیموں حماس اور حزب اللہ کے سربراہان اور اپنے سرکردہ کمانڈر کی اسرائیلی حملوں میں شہادت کے بعد یکم اکتوبر پر اسرائیل پر 200 بیلسٹک میزائلوں سے حملہ کیا تھا ایرانی حکومت کی ترجمان فاطمہ مہاجرانی کا کہنا تھا کہ تمام کوششیں ملک کی دفاعی ضروریات کو مدنظر رکھ کر کی جارہی ہیں.
واضح رہے کہ 7 اکتوبر 2023 کو حماس کے اسرائیل پر حملے کے بعد اسرائیل کی غزہ پر جوابی جارحیت اور فلسطینیوں کی نسل کشی کے نتیجے میں خطے میں تناﺅ عروج پر پہنچ گیا ہے جبکہ اسرائیل نے گزشتہ ماہ اپنی جارحیت کا رخ لبنانی کی عسکری تنظیم حزب اللہ کی جانب موڑ دیا ہے یاد رہے کہ اسرائیلی جارحیت کے نتیجے میں غزہ میں اب تک 43 ہزار 20 افراد شہید ہوچکے ہیں جن میں اکثریت خواتین اور بچوں کی ہے جبکہ ایک لاکھ ایک ہزار 110 افراد زخمی اور 10 ہزار سے زائد تباہ شدہ عمارتوں کے ملبے تلے دبے ہوئے ہیں.
