سٹیٹ بینک نے نئےکرنسی نوٹوں سے متعلق وضاحتی بیان جاری کیا ہے۔
سٹیٹ بینک کا کہنا ہے کہ جنوری 24 میں موضوعاتی ڈیزائن اور آئیڈیاز کے لیے کرنسی ڈیزائن آرٹ مقابلےکا انعقادہوا،یہ بات واضح کی جاتی ہے کہ مقابلہ میں جن ڈیزائنوں کو فاتح قرار دیا گیا وہ بینک نوٹوں کی نئی سیریز چھپائی کے لیے شارٹ لسٹڈ ڈیزائن نہیں۔
مقابلے کے ان نتائج کو ذرائع ابلاغ اور بعض عوامی حلقوں نےنئے بینک نوٹوں کی سیریز کے ڈیزائنوں کی شارٹ لسٹنگ سے تعبیر کیا،نتائج کے اعلان کا مقصد محض فنکاروں کی کاوشوں کو سراہنا اور ان کی حوصلہ افزائی کرنا تھااس کا اور کوئی مقصد نہیں۔
مقابلےمیں جمع کرائے گئے ڈیزائنوں کا جائزہ ماہرین پر مشتمل کمیٹی نے لیا اور فاتح کا اعلان 5 ستمبرکو کیا گیا،آرٹ کمیٹی نے فاتح ڈیزائن کا انتخاب محض اس کے فنی معیارکے موضوع کی بنیاد پر کیا۔
نئی سیریز کے حتمی ڈیزائن مسابقتی عمل کے ذریعے منتخب کردہ معروف بین الاقوامی کمپنیاں ڈیزائن کریں گی،یہ کمپنیاں ممکنہ طورپر دسمبر 2024 تک نئے ڈیزائنز کے لیے اپنی تجاویز پیش کریں گی۔
سٹیٹ بینک بورڈ کی جانب سے منظور کردہ ڈیزائنز جنوری 2025 تک حتمی منظوری کے لیے وفاقی حکومت کو پیش کیے جائیں گے،وفاقی حکومت کی منظوری کے بعد ہی نئے ڈیزائن کے بینک نوٹوں کی سیریز کی چھپائی کا عمل شروع کیا جائے گا۔
