میئرسکھرارسلان شیخ کے300 ملی میٹر بارش ریکارڈکے دعوے کے جواب میں محکمہ موسمیات نے116ملی لیٹربارش ہونے کی رپورٹ جاری کردی
سکھر میں ریکارڈ بارش ہونے سے متعلق معاملہ پیچیدگی کا شکار ہوگیا میئر سکھر ارسلان شیخ نے شہر میں 300 ملی میٹر بارش کا دعوی کیا ہے جبکہ محکمہ موسمیات نے ان کے دعوے کی تردید کردی ہے.
تفصیلات کے مطابق سکھر میں گزشتہ 2 روز سے جاری بارش نے انتظامیہ کی کارکردگی کا پول کھول دیا ہے، شہر کی سڑکیں تالاب کا منظر پیش کرنے لگیں جبکہ ریلوے اسٹیشن اور اطراف کے علاقے تاحال پانی میں ڈوبے ہوئے ہیں اس حوالے سے میئر سکھر ارسلان شیخ نے دعویٰ کیا کہ شہر میں 77 سال کی تیز ترین اور 292 ملی میٹر بارش ریکارڈ ہوئی، سماجی رابطے کی ویب سائٹ ”ایکس “پر ویڈیو پیغام جاری کرتے ہوئے ارسلان شیخ نے شہر کے 90 فیصد علاقوں سے پانی کی نکاسی کا دعوی کیا.
دوسری جانب محکمہ موسمیات نے میئر کے سکھر میں 300 ملی میٹر بارش کے دعوے کی تردید کرتے ہوئے چیف میٹرو لوجسٹ سردار سرفراز نے واضح کردیا کہ 48 گھنٹے کے دوران سکھر میں 116 ملی میٹر بارش ریکارڈ ہوئی ، 2 روز کے دوران 300 ملی میٹر بارش کی بات میں صداقت نہیں ہے. بعد ازاں وزیر بلدیات سندھ سعید غنی نے میئر سکھر کی حمایت کرتے ہوئے کہا کہ محکمہ موسمیات کے پاس بارش کی پیمائش کے ٹاور ہرجگہ موجود ہی نہیں جبکہ صوبائی حکومت ہرتعلقے کی سطح پر ڈیٹا مرتب کرتی ہے.
