ذاتی حیثیت میں ایسی درخواستیں دائر نہیں ہوسکتیں، رجسٹرار آفس سپریم کورٹ
سپریم کورٹ کے رجسٹرار آفس نے چیف جسٹس قاضی فائز عیسیٰ پر اعتراض پر مبنی متفرق درخواستیں اعتراض لگا کر واپس کرتے ہوئے کہا ہے کہ ذاتی حیثیت میں ایسی درخواستیں دائر نہیں ہوسکتیں۔
واضح رہے کہ پی ٹی آئی رہنما شوکت بسرا اور دیگر افراد کی جانب سے ذاتی حیثیت میں چیف جسٹس قاضی فائز عیسیٰ کی الیکشن ٹربیونلز کیس کے بینچ میں شمولیت پر اعتراض کیا گیا تھا۔ تاہم رجسٹرار سپریم کورٹ نے درخواستیں اعتراض لگا کر واپس کر دیں۔
خیال رہے کہ سپریم کورٹ آف پاکستان کے چیف جسٹس قاضی فائز عیسیٰ کی سربراہی میں عدالت عظمیٰ کا 5 رکنی لارجر بینچ 19 اگست کو الیکشن ٹربیونلز کیس کی سماعت کرے گا۔
دوسری طرف پنجاب میں الیکشن ٹربیونلز کے قیام کے کیس میں پی ٹی آئی کے وکیل رہنما سلمان اکرم راجا نے التوا کی درخواست دائر کر دی ہے۔ سلمان اکرم کا درخواست میں کہنا ہے کہ ایڈووکیٹ حامد خان 6 ستمبر تک بیرون ملک ہیں۔ عدالت سے استدعا ہے کہ مقدمے کی سماعت حامد خان کی واپسی تک ملتوی کی جائے۔
