اسلام آباد: یوٹیلیٹی اسٹورز پر وزیراعظم ریلیف پیکج کی مدت ختم ہو گئی۔ نئے ریلیف پیکج کے اطلاق تک موجودہ پیکج جاری رکھنے کا فیصلہ کر لیا گیا۔
ذرائع کے مطابق بجٹ میں اعلان کردہ وزیر اعظم ریلیف پیکج کا اطلاق گزشتہ روز سے نہ ہوسکا۔ جب تک نئے پیکج کا اطلاق نہیں ہوتا موجودہ وزیر اعظم پیکج جاری رکھا جائے گا۔
یوٹیلیٹی اسٹورز پر نئے پیکج کے لیے ای سی سی اور وفاقی کابینہ کو سمری بھیجی جائے گی۔
حکام نے بتایا کہ وزیر اعظم ریلیف پیکج کے تحت یوٹیلیٹی اسٹورز میں 5 بنیادی اشیا پر سبسڈی دی جا رہی ہے۔ چینی، گھی، آٹا، چاول، دالوں پر بی آئی ایس پی صارفین کو سبسڈی دی جا رہی ہے۔
ذرائع کا کہنا ہے کہ بجٹ میں یوٹیلیٹی اسٹورز پر وزیر اعظم اور رمضان پیکج کے لیے 65 ارب روپے مختص کیے گئے ہیں جبکہ وزیر اعظم رمضان ریلیف پیکج کے لیے 10 ارب روپے اور وزیرا عظم ریلیف پیکج کے لیے 55 ارب روپے مختص کیے گئے ہیں۔
ذرائع نے مزید بتایا کہ مالی سال 24-2023 کے لیے وزیر اعظم پیکج کے تحت 35 ارب روپے مختص کیے گئے تھے۔
