وزیر خارجہ بلاول بھٹو زرداری کے ہمراہ 20 سے زائد ممالک کے سفارت کاروں اور عالمی اداروں کے نمائندوں نے سیلاب سے متاثرہ علاقوں کا فضائی دورہ کیا۔دفتر خارجہ کی جانب سے جاری بیان کے مطابق وزیرخارجہ کے ہمراہ سفارت کاروں اور عالمی اداروں کے نمائندگان نے سندھ، بلوچستان اور خیبرپختونخوا کے سیلاب سے متاثرہ علاقوں کا دورہ کیا۔ ترکمانستان، بحرین، سعودی عرب، آذر بائیجان، جرمنی اور سپین کے سفارتکار سیلاب سے متاثرہ علاقوں کے دورہ کے موقع پر بلاول بھٹو زرداری کے ہمراہ تھے۔
وزیر خارجہ کے ہمراہ امریکا، چین، فرانس، جاپان، اٹلی، جنوبی کوریا، قطر اور ترکیہ کے علاوہ اقوام متحدہ سمیت دیگر عالمی اداروں کے نمائندگان نے بھی سیلاب سے متاثرہ علاقوں کا فضائی جائزہ لیا۔وفاقی وزیر خورشید شاہ اور وزیراعلی سندھ نے سکھر ائیرپورٹ پر وزیرخارجہ بلاول بھٹو زرداری، وفاقی وزیر برائے منصوبہ بندی اور سفارت کاروں کا استقبال کیا
سفارت کاروں اور عالمی اداروں کے نمائندگان کو سکھر ائیرپورٹ پر سیلاب سے ہونے والی تباہی کے حوالے سے این ڈی ایم اے کی بریفنگ دی گئی۔وزیر خارجہ بلاول بھٹو زرداری نے مختلف ممالک کے سفارت کاروں اور عالمی اداروں کے نمائندگان کو پاکستان میں ہونے والے نقصانات سے آگاہ کیا۔
