وزیر خارجہ نے کہا کہ پاکستان میں سیلاب سے بڑے پیمانے پر تباہی ہوئی۔
وزیرخارجہ بلاول بھٹونے اقوام متحدہ کے رکن ممالک سے سیلاب متاثرین کی مدد کی اپیل کرتے ہوئے کہا ہے کہ پاکستان میں سیلاب سے بڑے پیمانے پر تباہی ہوئی، سیلاب سے 3 کروڑ افراد متاثر ہوچکے ہیں۔
وزیرخارجہ بلاول بھٹو زرداری نے دفترخارجہ میں تقریب سے خطاب کرتےہوئے کہا کہ موسمیاتی تبدیلی سےپاکستان پرمنفی اثرات پڑرہےہیں،موسمیاتی تبدیلی کے باعث رواں سال پاکستان میں ہیٹ ویو نے تمام ریکارڈ توڑ دیے،پاکستان میں گرمی کی شدت بھی بڑھتی جارہی ہے۔
انہوں نے کہا کہ موسمیاتی تبدیلی کے باعث پاکستان کو شدید بارشوں اور سیلاب کا سامنا ہے،پاکستان گلوبل وارمنگ کی وجہ سے براہ راست متاثر ہورہا ہے۔
وزیرخارجہ کا کہنا تھا کہ رواں سال ہونےوالی مون سون بارشیں غیرمعمولی تھیں،72 اضلاع میں 3 کروڑ افراد کو سیلاب کی صورتحال کا سامنا ہے، سیلاب سے قیمتی انسانی جانوں کا ضیاع ہوا، لائیو اسٹاک اور فصلوں کو بھی نقصان پہنچا۔
انہوں نے مزید کہا کہ سیلاب متاثرین کے لیے عالمی امداد کی ضرورت ہے،سیلاب متاثرین کو صاف پانی اور کھانے پینے کی اشیاء تک رسائی مشکل ہوگئی ہے،ان کے لیے پانی، خوراک اور رہائش کی ضرورت ہے۔
بلاول بھٹو نے کہا کہ بارشوں اور سیلاب سے معیشت کو بھاری نقصان اٹھانا پڑا، بے نظیر انکم سپورٹ پروگرام کے ذریعے متاثرین کو امداد دی جارہی ہے،پاکستان کی حکومت اور عوام سیلاب متاثرین کے ساتھ کھڑی ہے۔
ان کا مزید کہنا تھا کہ ہمیں عالمی برادری کی طرف سے فوری مدد کی ضرورت ہے،دنیا کے کئی ملک ہماری مدد کو آگے آئے،امداد اور تعاون پر تمام عالمی اداروں اوردوست ممالک کے شکر گزار ہیں۔
