اتحادیوں نے سیلاب متاثرین کی امداد کیلئے اندرون و بیرون ملک سے عطیات جمع کرنے کیلئے مہم چلانے پر اتفاق کیا ہے
اسلام آباد: وفاقی حکومت نے سیلاب زدگان کی مدد کے لئے فلڈ رسپانس اینڈ کوآرڈینیشن سینٹر (این ایف آر سی) قائم کرنے کا فیصلہ کرلیا۔
دارالحکومت میں سیلاب سے متعلق وزیراعظم کی زیر صدارت حکومت کی اتحادی جماعتوں کا اجلاس ہوا جس میں اعلٰی عسکری قیادت بھی شریک ہوئی۔
اعلامیے کے مطابق اجلاس میں شرکاء نے سیلاب کی صورتحال کا تفصیلی جائزہ لیا اور جاں بحق افراد کے لئے فاتحہ خوانی کی۔
اعلامیے میں کہا گیا کہ اجلاس میں قومی سطح پر تعمیر نو کا جامع پلان مرتب کرنے اور متاثرین کی آباد کاری کے لئے مؤثر منصوبہ بندی کرنے پر اتفاق ہوا جب کہ فیصلہ کیا کہ مکمل بحالی کے لئے ہر ممکن وسائل بروئے کار لائیں جائیں گے۔
اس کے علاوہ حکومتی اتحادی جماعتوں نے سیلاب متاثرین کی امداد کے لئے اندرون اور بیرون ملک سے عطیات جمع کرنے کے لئے مہم چلانے پر اتفاق کیا ہے۔
دوسری جانب وفاقی حکومت نے سیلاب زدگان کی مدد کے لئے فلڈ رسپانس اینڈ کوآرڈینیشن سینٹر بھی قائم کرنے کا فیصلہ کرلیا۔
ایک ٹوئٹ میں وزیراعظم شہباز شریف نے کہا کہ فلڈ ایمرجنسی میٹنگ میں این ایف آرسی کے قیام کی منظوری دی گئی جو کہ سیلاب متاثرین کی معلومات فوری طور پر متعلقہ ایجنسی کو دے گا۔
شہباز شریف نے کہا کہ یہ سینٹر امدادی کاموں کی نگرانی کرے گا اور ڈیزاسٹر مینجمنٹ اتھارٹیز، ڈونرز اور سرکاری ایجنسیوں کے درمیان پل ہوگا۔
