وزیراعظم شہبازشریف نے ارجنٹائن کیخلاف تاریخی فتح پرسعودی ولی عہد کو مبارکباد دیتے ہوئے کہا کہ آج فٹ بال کی شاندار گیم دیکھی، سعودی عرب نے فیفا ورلڈ کپ کا بڑا اپ سیٹ کرکے تاریخ رقم کی۔ انہوں نے ٹویٹر پر اپنے پیغام میں کہا کہ خوشی کی اس گھڑی میں سعودی بہن بھائیوں کی خوشی میں شریک ہیں، آج فٹ بال کی شاندار گیم دیکھی، سعودی عرب نے ارجنٹائن کیخلاف فیفا ورلڈ کپ کا بڑا اپ سیٹ کرکے تاریخ رقم کردی ہے۔
وزیراعظم نے سعودی عرب کی ارجنٹائن کیخلاف تاریخی فتح پر سعودی ولی عہد شہزادہ محمد بن سلمان کو مبارکباد پیش کی ہے۔ یاد رہے فیفا ورلڈکپ 2022ء میں آج پہلا اور بہت بڑا اپ سیٹ ہوا ہے کہ سعودی عرب نے ارجنٹینا کو ایک مقابلے میں دو گولز سے ہرا دیا ہے۔
قطر کے لوسیل اسٹیڈیم میں کھیلے گئے گروپ سی کے اس میچ میں ارجنٹینا کو 10ویں منٹ میں پنالٹی سٹروک ملی جس کا فائدہ اٹھاتے ہوئے کپتان لائیونل میسی نے اپنی ٹیم کو 0-1 کی برتری دلادی۔
میچ کے پہلے ہاف کا اختتام جنوبی امریکی ٹیم کی برتری کے ساتھ ختم ہوا تاہم دوسرے ہاف کے آغاز میں سعودی عرب نے ارجنٹائن کے دفاع کو توڑ ڈالا۔ پہلے 48ویں منٹ میں صالح الشہری کے گول کی مدد سے اسکور 1-1 سے برابر ہوا پھر صرف 5 منٹ کے فرق سے سلیم الضصاری کے گول کی مدد سے 1-2 کی برتری حاصل کرلی۔ اس کے بعد میسی الیون نے میچ میں سعودی عرب کی برتری ختم کرنے کے لیے اس کے گول پر تابڑ توڑ حملے کیے جو ناکام رہے اور 1-2 کے اسکور کے ساتھ ہی اس میچ کا اختتام ہوگیا۔ دوسری جانب فیفا ورلڈ کپ میں ارجنٹینا کے خلاف تاریخی جیت کی خوشی میں سعودی عرب میں عام تعطیل کا اعلان کردیا گیا ہے، خادم حرمین شریفین شاہ سلمان بن عبدالعزیز کے حکم پر بدھ 23 نومبر کو مملکت میں عام تعطیل ہوگی
