امریکی حکام نے ایک پاکستانی شہری کو مبینہ طور پر ایرانی ساختہ میزائل کے پرزے اور وارہیڈز اسمگل کرنے کے الزام میں گرفتار کیا ہے۔
عرب نیوز کے مطابق امریکی حکام کا کہنا ہے کہ مبینہ پاکستانی شہری ایک کشتی کا کیپٹن ہے جو یمن میں حوثی باغیوں کیلئے ایرانی ساختہ میزائل کے پرزے لے کر جا رہی تھی۔
امریکی کوسٹ گارڈز نے کشتی کو روکا تو کیپٹن نے جھوٹ بولا، تلاشی لینے پر میزائل کے پرزے برآمد ہوئے جس پر اسے گرفتار کرلیا گیا، اور اب وہ پاکستانی وار ہیڈ اور دیگر ہتھیاروں کی اسمگلنگ کی کوشش اور کوسٹ گارڈ کے ساتھ غلط بیانی کے الزام میں مقدمے کی سماعت کا انتظار کر رہا ہے۔
بحیرہ احمر اور خلیج عدن میں تجارتی اور فوجی جہازوں پر حوثیوں کے مسلسل حملوں کے نتیجے میں 11 جنوری کو بحیرہ عرب میں دو نیوی سیلز بغیر جھنڈے والے جہاز پر سوار ہوتے ہوئے ڈوب گئے۔
عدالتی دستاویزات میں، امریکی وفاقی استغاثہ نے کہا کہ جب امریکی بحریہ نے جہاز میں سوار ہونے کی کوشش شروع کی تو کشتی کے کپتان محمد پہلوان نے رفتار کم کرنے سے انکار کر دیا اور ’نیوی کے سوار ہونے سے پہلے عملے کو کشتی جلانے کا حکم دیا۔‘
اس کشتی کو ”ڈھو“ کے طور پر بیان کیا گیا تھا، جو کہ روایتی دیسی ساختہ کشتیوں کیلئے استعمال ہوتا ہے۔
عدالتی دستاویزات کے مطابق ’انجن کو بند کرنے کے بجائے، پہلوان نے عملے کے ارکان سے کہا کہ ڈھو کو نہ روکے‘۔
’درحقیقت، پہلوان نے ڈھو کو تیز کرنے کی کوشش کی۔ آخر کار عملے کا ایک رکن، انجن کی طرف بڑھا اور کشتی کو روک دیا‘۔
امریکی حکام نے بتایا کہ نیوی اسپیشل وارفیئر آپریٹر فرسٹ کلاس کرسٹوفر جے چیمبرز کشتی اور سیلز کی جنگی بوٹس کے درمیان اونچی لہروں کی وجہ سے پیدا ہونے والے خلا میں جاگرے۔
چیمبرز کے گرتے ہی بحریہ کے اسپیشل وارفیئر آپریٹر سیکنڈ کلاس ناتھن گیج انگرام نے چھلانگ لگا کر انہیں بچانے کی کوشش کی، تاہم، وہ بھی تیز لہروں کی نذر ہوگئے، دونوں سیلز کو ڈھونڈنے اور بچانے کی کوششیں ناکام رہیں اور بعد میں انہیں بحریہ نے مردہ قرار دے دیا۔
منگل کو امریکی ریاست ورجینیا کے شہر رچمنڈ میں امریکی ڈسٹرکٹ کورٹ میں سماعت کے دوران، ایف بی آئی کے خصوصی ایجنٹ لارین لی نے گواہی دی کہ پہلوان نے ابتدائی طور پر کہا کہ وہ کشتی کا انجینئر تھا اور کپتان جہاز سے اتر گیا تھا۔
اس نے یہ بھی کہا کہ وہ جہاز پر کسی سامان کے بارے میں نہیں جانتا تھا۔
پہلوان نے کہا کہ اس نے بعد میں اپنی بات بدلتے ہوئے کہا کہ ’میں کشتی کا کمانڈر ہوں‘۔
اسسٹنٹ یو ایس اٹارنی ٹرائے ایڈورڈز جونیئر نے دلیل دی کہ پہلوان کو زیر التواء مقدمے تک حراست میں رہنا چاہیے کیونکہ وہ کمیونٹی کے لیے خطرہ ہے اور اس کے بھاگنے کا بھی امکان ہے۔
ایڈورڈز نے کہا کہ پہلوان کا امریکہ سے کوئی تعلق نہیں ہے اور اس کے خلاف سب سے سنگین الزام جان بوجھ کر ایک وارہیڈ منتقل کرنا یہ جانتے ہوئے کہ اسے حوثی باغی فورسز استعمال کریں گی دہشت گردی کا ایک وفاقی جرم ہے اور اس کی زیادہ سے زیادہ 20 سال قید کی سزا ہے۔
باقی جھوٹے بیانات دینے کے الزام میں اسے زیادہ سے زیادہ پانچ سال قید ہو سکتی ہے۔
پہلوان کے وکیل، اسسٹنٹ سپروائزری فیڈرل پبلک ڈیفنڈر ایمی آسٹن نے تجویز کیا کہ امریکی حکام نے کشتی پر عملے کے ارکان سے پوچھ گچھ کیلئے جو ترجمان استعمال کیا ہو سکتا ہے کہ وہ پہلوان کی زبان پنجابی نہ سمجھا ہو۔
لی نے کہا کہ وہ نہیں جانتیں کہ مترجم کون سی زبان بولتا ہے، لیکن انہوں نے کہا کہ پہلوان نے بعض اوقات گھنٹوں طویل انٹرویوز کے دوران مترجم کی طرف سے پوچھے گئے سوالات کے جوابات دیے۔
ایف بی آئی کے ایک ایجنٹ نے لکھا کہ کشتی کی تلاشی کے دوران، امریکی افواج نے ایرانی ساختہ جدید روایتی ہتھیار برآمد کیے، جن میں درمیانے فاصلے تک مار کرنے والے بیلسٹک میزائل اور اینٹی شپ کروز میزائل کے اہم حصے، ایک وار ہیڈ، اور پروپلشن اور رہنمائی کے اجزاء شامل ہیں۔
ایجنٹ نے کہا کہ ملنے والی اشیاء حوثی باغیوں کی جانب سے تجارتی جہازوں اور امریکی فوجی جہازوں پر حالیہ حملوں میں استعمال ہونے والے ہتھیاروں سے مطابقت رکھتی ہیں۔
حلف نامے میں امریکی سینٹرل کمانڈ کا حوالہ دیتے ہوئے کہا گیا ہے کہ نومبر میں حوثیوں کے حملے شروع ہونے کے بعد سے یہ ’ایران کی طرف سے فراہم کیے جانے والے جدید روایتی ہتھیاروں‘ کا پہلا قبضہ ہے۔
کشتی کے عملے کے تین دیگر ارکان پر امریکی کوسٹ گارڈ کے افسران کو غلط معلومات فراہم کرنے کا الزام عائد کیا گیا تھا۔
منگل کو سماعت کے بعد انہیں حراست میں لینے کا بھی حکم دیا گیا تھا۔
عدالتی دستاویزات میں کہا گیا ہے کہ عملے کے ارکان نے پہلوان کی بطور کپتان شناخت کی اور کشتی میں موجود ہتھیاروں اور ایران سے جہاز کی روانگی کے بارے میں جھوٹ بولا۔
ان افراد نے دعویٰ کیا تھا کہ ان کے سفر کا اصل مقام پاکستان سے تھا۔
عملے کے مزید 10 ارکان کو وفاقی گواہی قانون کے تحت حراست میں لیا جا رہا ہے جو عدالتوں کو کسی شخص کی گرفتاری اور نظربندی کے وارنٹ جاری کرنے کی اجازت دیتا ہے اگر اس کی گواہی ”مجرمانہ کارروائی میں مواد“ ہو۔
ایف بی آئی کے حلف نامے میں کہا گیا ہے کہ عملے کے ارکان ایران کے نیم فوجی پاسداران انقلاب کے ایک رکن کے ساتھ سیٹلائٹ فون کے ذریعے متعدد بار رابطے میں تھے۔
